Plantun de Prouvènço

Pèr coumpara dos planto d'encò nostre

Pulmonaria longifolia & Leptodon smithii

Póumounello(-di-lóngui-fueio)

Pulmonaria longifolia

Boraginaceae

Àutri noum : Erbo-dóu-poumoun, Erbo-de-la courado.

Noms en français : Pulmonaire à longues feuilles, Herbe-aux-poumons.

Descripcioun :
Aquesto erbo-de-la-courado trachis dins li blachiero e àutri bos fres. Se recounèis à si lòngui fueio d'estiéu tacado, 3 à 10 cop pu longo que larjo, e pourtado pèr un pecou. L'enflourejado èi peréu mai courto que la cambo. La subsp. que resto en Prouvènço, ié dison, cevennensis qu'es uno endemico dóu relarg. La planto èi proutejido sus listo roujo, categourìo LC, es à dire soucit minour.

Usanço :
Li flour e li fueio soun manjadisso cruso o cuecho. Sèmblo agué li mémi prouprieta que Pulmonaria officinalis, planto cultivado, sarié espetouranto e sudourifico (principe di signaturo - li fueio tacado dounon d'èr à un póumoun).

Port : Erbo
Taio : 10 à 60 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Pulmonaria
Famiho : Boraginaceae

Ordre : Ordre pas nouma

Coulour de la flour : Bluio
Petalo : 5
Ø (o loungour) flour : 16 à 19 mm
Flourido : Printèms Ivèr

Sòu : Ca
Autour basso e auto : 100 à 800 m
Aparado : Noun
Remarco : Meno endemico
Febrié à Jun

Liò : Blachiero - Bos fres
Estànci : Mesoumediterran à Mountagnard
Couroulougi : Éuropo-Ouèst
Ref. sc. : Pulmonaria longifolia (Bastard) Boreau, 1857

Crosso-de-Smith

Leptodon smithii

Neckeraceae

Nom en français : Leptodon de Smith.

Descripcioun :
Aquelo mousso pluroucarpo trachis majamen sus li pège d'éuse e de roure. Douno de mato plato pu o mens grando, li tijo soun un à dous cop penado. Bagnado fai de tijo plato alor que seco douno de crosso que sèmblon pièi de cascavèu. La fueio èi redouno-óublougo emé de bord lisc. La costo fai aperaqui li tres part dous de la longour de la fueio.

Usanço :
I'a pas trop pèr s'engana emé la crosso-de-Smith que se recounèis pulèu bèn. Es uno meno proun coumuno au nostre e dins lou relarg mediterran. Au contre devèn raro à l'uba, pèr acò èi marcado sus listo roujo categourìo LC valènt à dire soucit minour.